[paolo b]

Dovì molarghela de mandarme ste caène, tipo che - el mondo ze bèo, ma solo se rispedisso tuto subito a raquanti amissi e conossenti, sinò te capita le pezo sfighe, come a chel negro dell'Alabama che no gà rispedìo quattrossentosessantatrè imeil e l'è stà brusà da un fulmine o Jhon, chel cau-boi del texas che ghe ze cascà le balote fin chel monzeva…
Par no parlare de quei che te dise che ghe ze un provider, american, che ghe da un scheo in beneficensa, par la lota contro la "jeja scaveiona", ogni letara che te mandi…O staltro del Missuri che gà na fiola co na malatia rarissima e el te domanda de teefonarghe al celulare par dirghe se te ghè qualche rimedio da sugerirghe, poi te vardi meio e te vedi che la caèna ze partìa tre ani fa e chissà a tosa dove chea ze…e po' ghe ze quei che te dise che te ghè el virus dea posta gnetronica che se no te ste tento te lo ciapi anca ti e ze pezo de 'ndare co nà somala…e quei che te manda la fotocopia del centro tumori de Aviano dove i siensiati te dise che i ovi fa vignere el cancaro ai maròni e che farse un siampo ze pezo che fumarse tre steche de sigarete "AlfaSensa Filtro"…Ghe ze parfin quela dita che dà via teefonini come se i fusse bagigi e basta che te rispondi e riva direto casa tua el siòr Erisson o el siòr Nocchia e i te porta el scartosso col teefonin conpleto de custodia de pitone…
Par piassere basta! Mandème foto porno, barzeete, proverbi in dialeto ... ma BASTA CO STE CAENE, che naltro fià verzo na feramenta e taco vendarle!!